Naš projekt

W lěće 2020 je so naša ideja „Serbske dźěćace spěwy online“ we wubědźowanju „Čiń sobu“ w kategoriji „Žiwa dwurěčnosć“ wuspěšnje přesadźiła. Naš zaměr je, pokład dźěćacych spěwow staršim, kubłarjam a kubłarkam, wučerjam a wučerkam kaž tež dźěćom poskićeć. Chcemy spěwy  hromadźić, produkować, wozjewić a rozšěrjeć. Žiwe hajenje tradicijow je nam wažne a spěwy maja wšudźe přistupne być. Wjeselimy so, hdyž starši ze swojimi dźěćimi serbske spěwy słuchaja a spěwaja, nic jenož z tymi, kotrež serbske šule a pěstowarnje wopytaja, ale wšitcy domoródni, kotřiž maja zajim na dwurěčnej Łužicy.

Naš team

Lydija Maćijowa

rodź. 1984 w Budyšinje, bydli a dźěła we Łužicy. 

W Ludowym nakładnistwje Domowina so na medijowu překupču wukubła. Bydli ze swójbu a štyrjomi dźěćimi w Hrubjelčicach. Z lěta 2015 je swobodna redaktorka w Serbskim rozhłosu. Spěwa z časa dźěćatstwa w chórach a je tež jako spěwotwórča wustupiła

kontakt

Frieder Zimmermann

rodź. 1972 w Lipsku, studowaše kompoziciju na Wysokej šuli za hudźbu w Drježdźanach a wuknješe gitaru pola Guitar Craft. Wón je komponist a hudźbnik za dźiwadło, film a słuchohry a zwukowy technikar. Je woženjeny, nan třoch dźěći a bydli z wjacorymi generacijemi w Quohrenje blisko Drježdźan.

W swojim zwukowym studiju aranžuje a produkuje Frieder serbske dźěćace spěwy a hraje na gitarje a na dalšich instrumentach.

webstrona

Maria Maccyna

nar. 1984 w Budyšinje, bydli a dźěła w serbskim sydlenskim rumje. Z dźěćatstwa sem je spěwanje dźěl jeje wosobiny. Wuknješe gitaru, klawěr a spěw. Zapal za hłós a spěwanje dowjedźe ju k powołanju logopedki.

Wot 2009 je wona samostatna w swójskej praksy w Pančicach-Kukowje. Fenomen hłosa je jeje wšědny chlěb. Jako interpretka je mnoho titulow za Serbski rozhłós produkowała.

webstrona

Christian Schütz

rodźeny a wotrostł w Drježdźanach, zběraše wjele lět powołanske nazhonjenja jako grafikowy designer pola Stuttgarta. Dźensa bydli ze swójbu w Kreischa a dźěła samostatnje. Je wusměrjeny na naslědne a ekologiske temy, předewzaća a projekty.

Wón podpěruje „Serbske dźěćace spěwy“ wosebje we wobłuku designa – je logo a internetowu stronu wuwiwał.

webstrona

Dobyćerjo we wubědźowanju sakskeho fondsa „Čiń sobu“ w kategoriji „Žiwa dwurěčnosć“